5 રાજ્યોમાં ચૂંટણીની જાહેરાત, 3 ડિસેમ્બરે પરિણામ

5 રાજ્યોમાં ચૂંટણીની જાહેરાત, 3 ડિસેમ્બરે પરિણામ

રાજસ્થાન, મધ્યપ્રદેશ, છત્તીસગઢ, તેલંગાણા અને મિઝોરમમાં વિધાનસભા ચૂંટણીની તારીખોની જાહેરાત કરવામાં આવી છે. મુખ્ય ચૂંટણી કમિશનર (CEC) રાજીવ કુમારે સોમવારે પ્રેસ કોન્ફરન્સમાં જણાવ્યું કે છત્તીસગઢમાં 7 અને 17 નવેમ્બરે બે તબક્કામાં મતદાન થશે. આ સિવાય મધ્યપ્રદેશમાં 17 નવેમ્બર અને રાજસ્થાનમાં 23 નવેમ્બરે એક જ તબક્કામાં મતદાન થશે.

આ તરફ મિઝોરમમાં 7 નવેમ્બરે અને તેલંગાણામાં 30 નવેમ્બરે એક જ તબક્કામાં મતદાન થશે. પાંચેય રાજ્યોનાં પરિણામ 3 ડિસેમ્બરે આવશે.

પાંચ રાજ્યોમાં વિધાનસભા ચૂંટણીની તારીખો જાહેર કરવા માટે ચૂંટણી પંચની પ્રેસ કોન્ફરન્સ યોજાઈ હતી. ચૂંટણી કમિશનર રાજીવ કુમારે તેમના સાથીદારો સાથે પ્રેસ કોન્ફરન્સ કરી હતી. જેમાં પાંચ રાજ્યોમાં વિધાનસભા ચૂંટણીનો કાર્યક્રમ જાહેર કરવામાં આવ્યો હતો. મુખ્ય ચૂંટણી કમિશનરે કહ્યું કે આ ચૂંટણીઓમાં કુલ 16.14 કરોડ મતદારો તેમના મતાધિકારનો ઉપયોગ કરશે. જેમાં 8.2 કરોડ પુરુષ અને 7.8 કરોડ મહિલા મતદારો હશે. આ વખતે 60.2 લાખ નવા મતદારો પ્રથમ વખત મતદાન કરશે.

મુખ્ય ચૂંટણી કમિશનર રાજીવ કુમારે જણાવ્યું કે, ચૂંટણી પંચે તમામ 5 રાજ્યોની મુલાકાત લીધી અને તમામ રાજ્યોના રાજકીય પક્ષો સાથે બેઠક કરી. આ સિવાય સરકારી એજન્સીઓ અને રાજ્ય સરકારો સાથે બેઠક યોજાઈ હતી. અમે રાજકીય પક્ષોના નેતાઓને મળ્યા. તેમનાં સૂચનો અને પ્રતિભાવો લીધાં છે.
ચૂંટણી પંચની મહત્ત્વની વાતો, મહિલાઓ 8192 મતદાન કેન્દ્રની કમાન સંભાળશે

પાંચ રાજ્યોની 679 વિધાનસભા બેઠકો માટે 1.77 લાખ મતદાન મથકો બનાવવામાં આવ્યાં છે.
60.2 લાખ નવા મતદારો પ્રથમ વખત મતદાન કરશે. તેમની ઉંમર 18 થી 19 વર્ષની વચ્ચે છે. 15.39 લાખ મતદારો એવા છે કે જેઓ 18 વર્ષ પૂર્ણ કરવાના છે અને જેમની એડવાન્સ અરજીઓ આવી છે.
17734 મોડેલ બૂથ અને 621 મતદાન મથકનું સંચાલન વિકલાંગ કર્મચારીઓ દ્વારા કરવામાં આવશે. 8192 મતદાન મથકો પર મહિલાઓ કમાન સંભાળશે.
1.01 લાખ મતદાન મથકો પર વેબકાસ્ટિંગ થશે. આદિવાસીઓ માટે ખાસ બૂથ હશે. 2 કિલોમીટરની અંદર મતદાન મથકો હશે.
પ્રથમ વખત, છત્તીસગઢ-ઓરિસ્સા બોર્ડર પર ચાંદમેતામાં અને જગદલપુર બસ્તરમાં તુલસી ડોંગરી હિલ વિસ્તારમાં મતદાન મથક બનાવવામાં આવ્યું છે. અગાઉ ગ્રામજનોએ મતદાન કરવા માટે 8 કિમી ચાલીને બૂથ સુધી જવું પડતું હતું.
રાજસ્થાનના માઝોલી બાડમેરમાં બૂથ 5 કિમી દૂર હતું. 2023ની ચૂંટણી માટે 49 મતદારો માટે નવું બૂથ બનાવવામાં આવ્યું છે.
સી વિજીલ એપ દ્વારા ચૂંટણી પ્રવૃત્તિઓ પર નજર રાખવામાં આવશે. લોકો એપ દ્વારા ફરિયાદ કરી શકશે.
છત્તીસગઢમાં 15 વર્ષ બાદ કોંગ્રેસની સરકાર બની, ભૂપેશ બઘેલ CM બન્યા
છત્તીસગઢમાં 2018ની વિધાનસભા ચૂંટણીમાં કોંગ્રેસ 15 વર્ષ બાદ સત્તામાં પરત ફર્યું હતું. 90 બેઠકો પર યોજાયેલી વિધાનસભા ચૂંટણીનાં પરિણામોમાં કોંગ્રેસને બે તૃતીયાંશ બહુમતી મળી છે. જ્યારે ભાજપને માત્ર 15 બેઠકો મળી હતી જ્યારે કોંગ્રેસને 68 બેઠકો મળી હતી. બાદમાં કેટલાક ધારાસભ્યોએ પાર્ટી બદલી.

હાલમાં છત્તીસગઢમાં કોંગ્રેસના 71 ધારાસભ્યો છે, ભાજપ પાસે 13 ધારાસભ્યો છે, બસપા પાસે બે છે, ત્રણ ધારાસભ્યો જનતા કોંગ્રેસ છત્તીસગઢ પાર્ટીના છે અને એક ખાલી છે. રાજ્યમાં વર્તમાન મુખ્યમંત્રી ભૂપેશ બઘેલ છે.

2018માં તેલંગાણા વિધાનસભા ચૂંટણીમાં ભાજપને માત્ર એક સીટ મળી હતી
તેલંગાણામાં 2018ની વિધાનસભા ચૂંટણીમાં ભાજપને માત્ર એક જ સીટ મળી હતી. વર્તમાન મુખ્યપ્રધાન કે ચંદ્રશેખર રાવની પાર્ટી TRS (2022માં પક્ષનું નામ તેલંગાણા રાષ્ટ્ર સમિતિથી બદલીને ભારત રાષ્ટ્ર સમિતિ કરવામાં આવ્યું હતું)ને સૌથી વધુ 88 બેઠકો મળી હતી. જ્યારે કોંગ્રેસને 19 બેઠકો મળી હતી.

વર્તમાન પરિસ્થિતિની વાત કરીએ તો, શાસક પક્ષ પાસે હાલમાં 119 વિધાનસભા બેઠકોમાંથી 101 ધારાસભ્યો છે. અસદુદ્દીન ઓવૈસીની પાર્ટી AIMIM પાસે 7 ધારાસભ્યો છે, જ્યારે કોંગ્રેસ પાસે પાંચ, BJP પાસે ત્રણ, AIFB પાસે એક, એક નોમિનેટેડ અને એક અપક્ષ ધારાસભ્ય છે.

મિઝોરમમાં MNF 10 વર્ષ પછી પરત ફર્યું, BJP માત્ર એક સીટ જીતી
મિઝોરમમાં 2018ની વિધાનસભા ચૂંટણીમાં મિઝો નેશનલ ફ્રન્ટ (MNF) 10 વર્ષ પછી પરત ફર્યું. કુલ 40 બેઠકો પર યોજાયેલી ચૂંટણીમાં MNFને 26 બેઠકો મળી હતી જ્યારે કોંગ્રેસને પાંચ બેઠકો મળી હતી. આ સિવાય જોરમ પીપલ્સ મૂવમેન્ટને આઠ સીટ મળી અને એક સીટ ભાજપના ફાળે ગઈ. સત્તાધારી મિઝો નેશનલ ફ્રન્ટ પાર્ટીએ જોરામથાંગાને મુખ્યમંત્રી બનાવ્યા.

વિધાનસભાની વર્તમાન સ્થિતિની વાત કરીએ તો મિઝો નેશનલ ફ્રન્ટ પાસે હાલમાં 28 ધારાસભ્યો છે. કોંગ્રેસ પાસે પાંચ, જોરમ પીપલ્સ મૂવમેન્ટ પાસે એક, ભાજપ પાસે એક અને પાંચ અપક્ષ છે.